MGCY

已退休的林建欽（Paul）及半退休的黃錦明（Hugh）在2014年組成了公益慈善組合「MGCY明歌知欽」，最近推出新歌《再飛》，是「120歲的人」系列的第一首歌，他們笑言120歲是兩人加埋的歲數，Paul笑言：「不如我哋保密啲唔好講我哋邊個幾多歲，總之我係大股東，佢係小股東。」他們表示人生有高高低低，不能只有一首歌就講得晒，故決定分為三首歌，而《再飛》是第一部曲，講述就算已到他們現時這個年齡，但只要有信心，仍然可以追夢，他們表示：「依家有好多隱蔽長者，覺得同社會脫節，唔敢行出嚟，又有啲隱蔽青年，想話畀佢哋聽我哋兩個人加埋120歲都行出嚟，有咩所謂，所以想叫佢哋放開包袱，唔好做隱蔽嘅人，最緊要有快樂人生。」

對Paul而言，唱歌是他現時想追的夢，身為越南華僑的他表示學生時代就已很喜歡唱歌：「20歲參加過電視台嘅歌唱比賽，我攞到冠軍，以為可以開始歌唱路程，但當時係70年代，唔興中國香港嘅男歌星，所有歌星都係外來，例如台灣等，而另一個原因令我唔可以開始唱歌事業，係因為我生長喺一個封建嘅舊家庭，覺得唱歌係男人唔應該做嘅嘢，覺得唱歌係唔三唔四，雖然我唔同意，但都要聽屋企話，所以之後就冇開始唱歌，出嚟做嘢，其實我個心一直都唔忿氣，一直都有唱吓歌，直至3年前就同Hugh組成呢個組合。」Hugh亦表示：「其實我小學開始就已鍾意唱歌，中六中七畢業後其實想做社工，但因為家境問題，所以就放棄讀書，依家追夢就想做番啲關於社工嘅嘢，希望透過音樂串連公益活動，咁啱我哋兩個又鍾意唱歌同公益，所以就不謀而合做呢個組合。」

講到兩人認識的契機，他們表示很早前已經認識，Hugh媽咪是Paul的契媽，故兩人就像家人般親近，不時會一起jam歌。而講到兩人組成組合的經過，他們表示幾年前正值大家生日 ：「以生日名義開咗個party，但叫人唔使送禮，折現好啲，然後將收嚟嘅錢全部做善事，到2014年，見好似有啲fans，所以就想開演唱會，當時個場坐到400人，嗰陣就話咁要諗個組合名出嚟，就諗咗『明歌知欽』，到2015年就移師大啲嘅場地，就有一千人左右，演唱會更籌得一百萬嘅善款，全部捐晒去慈善機構。」他們坦言不但沒有收歌酬，反而自己掏了幾十萬出來製作演唱會，之後繼續做公益活動，更在2016年10月成立了慈善基金，希望可以擴大感召力。